ឯកឧត្តម ណយ ស្រូន សមាជិកក្រុមសមាជិកព្រឹទ្ធសភាប្រចាំភូមិភាគទី៨ បានរៀបចំពិធីប្រគល់ និងទទួលសម្ភារសប្បុរសធម៌ រួមមាន អាល់កុល ម៉ាស់ ទឹកបរិសុទ្ធ មីខ្លាឃ្មុំ និងថវិកាមួយចំនួន ពីសប្បុរសជននានា ដើម្បីចូលរួមក្នុងឱកាសខួបលើកទី១៥៨ ទិវាពិភពលោកកាកបាទក្រហម
![](https://senate.gov.kh/wp-content/uploads/2021/05/P8_2021-05-07_6.jpg)
នារសៀល ថ្ងៃព្រហស្បតិ៍ ទី០៦ ខែឧសភា ឆ្នាំ២០២១ ឯកឧត្តម ណយ ស្រូន សមាជិកក្រុមសមាជិកព្រឹទ្ធសភាប្រចាំភូមិភាគទី៨ និងជាអនុប្រធានកិត្តិយសសាខាកាកបាទក្រហមកម្ពុជា ខេត្តមណ្ឌលគិរី រួមជាមួយ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ព្រមទាំងលោក លោកស្រី ជាអនុប្រធានអចិន្ត្រៃយ៍ អនុប្រធានគណៈកម្មាធិការសាខា សមាជិក សមាជិកាគណៈកម្មាធិការសាខា អនុសាខាស្រុក បានរៀបចំពិធីប្រគល់ និងទទួលសម្ភារសប្បុរសធម៌ រួមមាន អាល់កុល ម៉ាស់ ទឹកបរិសុទ្ធ មីខ្លាឃ្មុំ និងថវិកាមួយចំនួន ពីសប្បុរសជននានា ដើម្បីចូលរួមក្នុងឱកាសខួបលើកទី១៥៨ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២១ ក្រោមប្រធានបទ “ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងជំងឺកូវីដ-១៩ និងកសាងភាពធន់របស់សង្គមជាតិ” ពិធីនេះបានប្រព្រឹត្តទៅនៅសាលប្រជុំសាលាខេត្តមណ្ឌលគិរី ។ នៅក្នុងពិធីប្រគល់-ទទួលសម្ភារនោះផងដែរ ឯកឧត្តម ណយ ស្រូន សមាជិកក្រុមសមាជិកព្រឹទ្ធសភាប្រចាំភូមិភាគទី៨ និងជាអនុប្រធានកិត្តិយសសាខាកាកបាទក្រហមកម្ពុជា ខេត្តមណ្ឌលគិរី ក៏បានចូលរួមឧបត្ថម្ភនូវសម្ភារសប្បុរសធម៌រួមមាន ទឹកបរិសុទ្ធ២០កេស មីខ្លាឃ្មុំ១០កេស អាល់កុល៦០លីត្រ ម៉ាស់១កេសធំ និងថវិកាចំនួន២,០០០,០០០រៀល ។